‫5 رحلات حلوة ورخيصة برا مصر تقدر تعملها بكره الصبح

09/08 00:44

ملحوظه : تم اضافه بعض التعديلات باللون الاحمر

-  ما تيجي نضرب الاسبوع الجي 3-4 ايام اجازه ، علي الويك اند يديك بتاع اسبوع اجازه حلو نطلع فيهم اي حته ؟

-  لا يا عم انا هاخد اسبوع كامل عشان الساحل ! برا مصر يا بوب

-  يا عم انت بتستعبط؟!  مش لسه يابني فيه اجراءات وفيزا وسفاره وزفت ! دا شهر ولا شهر ونص لو بدانا النهارده عشان نسافر اصلا !؟ وبه

- طب ايه رايك بقي اننا ممكن نسافر بكره الصبح لو عايزين ؟ ومن غير لا فيزا ولا بتنجان ورحله حلوه هتنبسط فيها فشخ والليله هتقف اول عن اخر 5-6 الاف سفر باقامه بكل حاجه!

-   ازاي يا عم ؟!

الحوار الي فوق دا دار فعلا بيني وبين صديق عزيز ، وكان مستغرب جدا لما قلتله ان فيه بلاد عادي ممكن الباسبور الاخضر ابو نسر دا الي بتستقل بيه يسمحلك تسافرها بكره الصبح عادي .. طبعا اظن بقي كتير من الناس بتسمع عن الليسته بتاعت البلدان الي ممكن تسافرها من غير فيزا الي لو بصيت عليها هتلاقي اغلبها دول عجيبه الاكوادور مثلا، بلد حلوه بس انت بتتكلم في امريكا الجنوبيه ! يعني اصلا تكاليف عاليه جدا ! او بلد زي ليسوتو ! مين الي عايز يسافر ليسوتو ؟!  وبعدين تكاليف الليله دي كام يابا ؟

فانا قررت بقي اني اكتب المقال دا، المقال دا هقترح فيه عليكم 5 رحلات لطيفه ممكن تعملها  لو واخد اجازه الاسبوع الجي دا علطول ، ومن غير فيزا ولا قرف وبدون سابق اعداد وبتكاليف بتتراوح من 6-10 الاف جنيه تكلفه كليه للسفر والاقامه كمان !  ايه رايك بقي ؟

ملحوظه : انا بما اني بحب الBudget traveling  فدايما بتلاقيني بكتب عن ارخص تكاليف بس بنزل اوي، المره دي قررت الرينج يمتد ل10 الاف عشان لو حد بيحب يبحبح شويه

واهم حاجه، اشتري مني، لو سمعت بلد اسمها غريب وصدمك ولقيتني بقترحها عليك، اشتري مني للاخر ، في بلدان كتيره معلوماتنا عنها محدوده لكنها في الحقيقه فيها حاجات جميله ورائعه وتستحق الزياره !.

1 – زور معبد جوبيتر وتسلق جبال الارز !

لبنان، بيروت ، بعلبك ، مظنش انك محتاج اسباب كتيره عشان تسافر لبنان!، فتوش سمبوسه، هيفاء وهبي ! الهواء والجبال والناس الرايقه، بيروت وفيروز .. لبنان من اجمل البلدان العربيه واكثرها جذبا للسياح بشكل عام.

والاجمل، انها مش محتاجه فيزا للمصريين ! كل الي انت محتاجه ، لما تنزل المطار يبقي معاك بس صوره من الباسبور و تذكره طيران رايح جي و17 دولار رسوم الفيزا الي هتطلعها مباشر من مطار بيروت.

من متطلبات الفيزا من مطار بيروت يكون معاك 2000 دولار كاش او شيك مصرفي يماثل نفس المبلغ :

صوره من متطلبات التاشيره من موقع السفاره اللبنانيه

لو مسافر الاسبوع الجي ، فيه رحلات رايح جي لبيروت ب2200 ج!

وبشكل عام، انصحك ترجع ل”دليل السفر والسنكحه للغلابه والصعاليك” لتفاصيل اكتر عن ازاي تلاقي رحلة طيران رخيصه.

هو صحيح انا مفترض غطيت قصه الاقامه دي بشكل كامل في “دليلك الشامل للاقامه وانت مسافر“ونصيحتي دايما ترجعله لما تفكر تشوف هتقعد فين وانت مسافر، بس خلينا نتكلم عن البلدان دي بشكل محدد.

طبعا مش انا الي هقولك ان لبنان احلي مكان تفكر تعمل فيه couchsurfing :D، بس خليني اتكلم في الاوبشنز التانيه برده ..

ممكن تاخد شقه من بابها في حدود 500 جنيه في اليوم ! (250 الفرد يعني)

والشقه دي بالتحديد الي تنفع ل3 افراد بحوالي 700 في الليله عجبتني جدا :

فيه كمان ارخص علي اطراف المدينه لو حبيت،  ولو عايز تنزل بالتكلفه اكتر من كدا كمان عندك هوستلز في حدود 200 جنيه الليله :

ولو انت ابن ناس اوي وبتاع اوتيلات، اسمحلي افاجئك بشويه هوتيلات رخيصه في بيروت وبالصدفه في عرض رائع خصم 36% علي اوتيل 4 نجوم !

يعني بتتكلم في تكلفه اجمالي سفر واقامه حوالي 4-5 الاف جنيه، 6 لو انت قاعد في اوتيل 4 نجوم !.

رحله حلوه ليك مع صحابك او اجمل للاسر ، فيه بيوت هاديه في الجبال هايله للاسر !.

زور بعلبك واتفرج علي معبد جوبيتر والانقاض الرومانيه الجميله !

وشوف اللينك دا برده هتلاقي حاجات كتيره تعملها في لبنان  

2 – زور البتراء ، وادي مجيب واحضر حفله موسيقيه !

مزيكا الاندر جراوند، جدل ، اوتوستراد ، البتراء وحاجات تانيه كتيره بتميز الاردن ، خاصه مدينه البتراء المشيده في الجبال (فيه ناس بتقول انها قريه قوم ثمود وعاد، معرفش مدي صحه الادعاءات دي)، بلد حلوه و ظريفه وزي ما اتفقنا، مش محتاجه فيزا للمصريين !،

وممكن تقيم فيها لمده شهر !.

لو مسافر الاسبوع الجي ، فيه رحلات رايح جي لمطار الملكه علياء بالاردن ،عمان ب2500ج

ومن اسكندريه ارخص شويه علي اير ارابيا ب2000ج

وتاني، انصحك ترجع ل”دليل السفر والسنكحه للغلابه والصعاليك” لتفاصيل اكتر عن ازاي تلاقي رحله طيران رخيصه.

شقه  لطيفه  ب220ج في الليله ل3 افراد في قلب عمان :

او لو عايز تقعد في هوستل ، عندك 2 مشهورين :

برج العرب، واسعاره بتبدا من 200 ج للغرفه للفرد الواحد ، ولو طبعا 2 او 3 هتقف ب140 مثلا

ودا بنص التمن تقريبا، ولو قعدت في dorms  ممكن تنزل بالتكلفه ل60-70 في الليله!.

ولولاد الناس زي ما اتفقنا الكيوت بتوع الاوتيلات :

الاوضه الاستوديو الفندقي ممكن يقف عليك ب500ج للفرد في ال5 ليالي ! او الف لو 4 نجوم.سعر مذهل!.

يعني بتتكلم في تكلفه اجمالي سفر واقامه حوالي 4 الاف جنيه، 5 لو انت قاعد في اوتيل 4 نجوم !.

تزور مدينه البتراء الشهيره الي مستحيل تشوف ليسته من الي بيتكلموا عن الحاجات الي لازم تشوفها قبل ما تموت متلاقيهاش من ضمنهم:

زور وادي مجيب، الGrand canyon  بتاع العرب !

استكشف الاردن الحديثه وعالم الاندرجراوند !

وشوف اللينك دا برده هتلاقي حاجات كتيره تعملها في الاردن

3 – استكشف منابع النيل، شاهد اكبر تشكيله طيور حيه في 24 ساعه وان كنت مغامرا فهيا نتسلق الكليمنجارو !

كينيا !، عمرك فكرت تسافر كينيا ؟! مظنش صح!. كينيا من اجمل بلدان افريقيا واغناها بالطبيعه والمناظر الخلابه!، تعرف ان جزيره بارينجو فيها الرقم العالمي لانواع الطيور ؟ فيه 342 نوع طيور حوالين البحيره دي، طبيعه مذهله وطبعا جبل افريقيا الاشهر كليمنجارو!

بص، انا هوريك صوره كمان عشان نقفل النقاش بتاع هل ممكن تفكر فعلا تسافر كينيا ولا لا :

جميل، كينيا مش محتاجه فيزا للمصريين كل الي انت محتاجه ، لما تنزل المطار يبقي معاك بس صوره من الباسبور و تذكره طيران رايح جي عشان تطلع فيزا من المطار هناك.

لو مسافر الاسبوع الجي ، فيه رحله  لنيروبي ب2800ج تقريبا

ممكن تاخد شقه ب500-600 جنيه في الليله ب4 افراد يعني تقف عليكم ب 150 ج للفرد في الليله !

او تاخد اوضه في هوستل  ب50 ج ل انتوا 4، او 100 لو انتوا 2 بحمام خاص!

والشباب السيس بتوع الاوتيلات والاسر :

5 ليالي ب2000 ج يا بوب البوبات ! و3 ستارز يعني!.

عارف طبعا ان الموضوع فكرته صعبه عليك، بس البلد فيها حاجات مبهره تستاهل تفكر تعملها ولو مره !

زور بحيره بارينجو العجيبه واستمتع بمشاهده فوق ال300 نوع طيور !

شوف احد اجمل المحميات الطبيعيه في العالم واستمتع باسراب فرس النهر !

زور بحيره توركانا الي في قلب الصحرا !

اتشقلب مع الناس الي هناك :

وشوف اللينك دا هتلاقي حاجات كتيره تعملها في كينيا !

4 – شهر عسل جديد في المالديف  !

مظنش محتاج مجهود كبير لو انت متجوز (خاصه لو جديد) اني اقنعك انك تسافر المالديف!.

جزر المالديف الرائعه ، من البلدان الي تقدر تسافرها عادي وتطلع فيزا في المطار هناك طالما معاك 400 دولار في جيبك وحجز طيران واوتيل !.

بس مش هضحك عليك، الطلعه دي اغلي شويه من الباقيين، بس اشتري مني .. تسوي !

يبدوا ان مصدر الكلام عن فيزا المالديف قد يكون فيه شبهه، حاولنا الاتصال بسفاره المالديف نفسها للتاكد بس محدش رد، بشكل عام لما بصيت علي موقع السفاره (الي حتي مش متاكد رسمي ولا لا مش واضح خالص!) لقيت انها بتاخد 3-5 ايام عمل يعني برده مش قصه يعني، النهارده هقابل صديق سافر المالديف واتاكد من المعلومه وااكدهالكم

تعديل احدث : تم التاكيد من سفاره المالديف ، مفيش فيزا ، تاشيره لما تنزل مطار المالديف، كل الي محتاجه يكون معاك حجز في اوتيل هناك و رسوم 10 دولار للفرد في الليله  (شوف كام واحد وقاعد اد ايه)

لو مسافر الاسبوع الجي  التذكره ب4000ج تقريبا

لو متخيل انها عشان المالديفز فانت هتشحت يبقي عيب عليك، سويت عالبحر ب 500 جنيه في الليله ل3 افراد ملكك لوحدك !

او لو البذخ مقطعك خد beach house  ب700 في الليله

او في سويت لطيف ل3 افراد ب300 جنيه لو عايز تسترخص :

وبما انك مسافر سفريه رومانسيه فممكن تكون طالبه معاك اوتيل (ولو اني شايف الحاجات التانيه دي اصيع!)

فيه اوفر دلوقتي ب1500-2000 لل5 ليالي !

يعني بتتكلم في تكلفه اجمالي سفر واقامه حوالي7 الاف جنيه للمالديف يا مؤمن !

الواحد مش مسافر المالديف يعمل حاجه اكتر من كدا :

5 – هيا نذهب الي فارس، ونقابل رستم ونقرا الشاهنامه !.

قلب فارس القديمه !، المدينه الاسطوريه المنسيه شيراز. رستم والاساطير الشرقيه، سحر الشرق والسجاجيد المصنوعه يدويا ،prince of Persia  300 وكل الافلام الي تناولت الطبيعه الساحره لفارس القديمه !. مدينه الادب والشعراء كحافظ الشيرازي وحدائق الزهور والقطط السمينه المزدانه بالشعر والنبيذ الشيزاري الشهير !

ايران من سنه كدا،قررت تلغي الفيزا للمصريين ! وتسمحلك ب20 يوم من غير فيزا في ايران.

تعديل : البعض تحدث عن احتمال وجود مشكلات امنيه في السفر لايران، انا معرفش لكن وجب التنبيه والتنويه

لو مسافر الاسبوع الجي ، السفر لمدينه شيزار بحوالي 3100ج

الحقيقه ان التدوير علي اماكن في ايران صعب جدا، ومفيش معلومات كتير بالانجليزي علي الانترنت، بس لقينا الاوتلات دي هي الاشهر في شيراز :

بارسيان اوتيل، واقف بحوالي 160 الفرد، 3 نجوم

واريو بارزان، اغلي سيكا وشيك 4 نجوم :

او بارس هوتيل 5 نجوم بالف في الليله :

ودا عامه لينك للاوتيلات الي في شيراز

طبعا بما انك في شيراز، لازم تزور حدائقها الشهيره !

دره الفتره الصفويه المعماريه، مسجد الامام !

مقام الحافظ الشيرازي وحديقه  جاهان ناما